மதுவிலக்கை மறுத்த பெரியார்

(பெரியார் என்றாலே நம் நினைவிற்கு வரும் பிம்பம் கள் ஒழிப்பிற்காக அய்ந்நூறு தென்னை மரங்களை வெட்டிச்சாய்த்தது. பாடப்பொத்தகத்திலும் இதுவே பதியவைக்கப்பட்டுள்ளது. ஆனால் பெரியார் காங்கிரசில் இருந்த காலத்தைத் தவிர மற்ற காலகட்டங்களில் பல்வேறு சந்தர்ப்பங்களில் மதுவிலக்கை எதிர்த்தே வந்துள்ளார் என்பதைக் கீழ்க்கண்ட அவரது கூற்றுகள் விளக்கும். இந்த மேற்கோள்கள் முனைவர்.மா.நன்னன் அவர்கள் தொகுத்த 'பெரியார்கணினி' நூலினின்று எடுக்கப்பட்டவை. மூலப்பிரதிகளை ஆராய்ந்து விரிவாக எழுதும் எண்ணமும் உண்டு. பொதுநீதி, பொது அறம், பொது ஒழுக்கம் என்னும் பெருங்கதையாடல்களிடிப்படையிலான பேரறங்களை அவர் எப்போதும் மறுத்தார் என்பதற்கு அவரது கீழ்க்காணும் வார்த்தைகளே சாட்சி.)

*மதுபானத்தால் பொருளாதாரக்கேடு ஏற்படுவதும் அறிவுக்கேடு ஏற்படுவதும் செயற்கையாலே ஒழிய இயற்கையால் அல்ல.
- கு. அ - 03.10.37*

பொதுவாக மது அருந்துவதையே குற்றமென்று சொல்லிவிடமுடியாது. கெடுதி உண்டாக்கும்படியானதும் பொருளாதாரத்திலும் அறிவிலும் கேடுவிளைவிக்கும்படியானதுமான மதுபானமே இன்று விலக்கப்படவேண்டியதாகும். அதைத்தான் நாம் மதுவிலக்கு என்பதே ஒழிய மதுவையே யாரும் எப்போதும் அடியோடு வெறுத்ததுமில்லை
- கு. அ - 03.10.37

* மதுவிலக்கு சர்க்காரின் மனதறிந்த ஒரு மோசடியாகவே இருந்துவருகிறது. இதனால் உழைப்பாளிமக்கள் உற்சாகம் குறைந்து சோம்பேறிகளாகவே ஆக்கப்படுவர்.

- வி - 29.11.62.
* பொதுவாக மதுவிலக்கு என்பது இயற்கையோடு போராடும் முட்டாள்தனமான போராட்டமேயாகும்.

- வி - 9.11.68

* மது அருந்துபவர்கள் எல்லோரும் யோக்கியப்பொறுப்பற்றவர்கள் என்றும் மது அருந்தாதவர்கள் எல்லோரும் யோக்கியப்பொறுப்புடையவர்கள் என்றும் கருதிவிடக்கூடாது.

- கு. அ - 16.02.69

* தீபாவளிக்கு லீவுவிடுவது எவ்வளவு முட்டாள்தனமோ அதைவிட இரண்டுபங்கு முட்டாள்தனம் மதுவிலக்கை எடுக்கமாட்டேன் என்று பிடிவாதமாக இருப்பதுமாகும்.

- வி - 21.10.69* மதுவிலக்கு என்பது ஒரு அதிகார ஆணவமே ஒழிய மனிதத்தன்மையில் சேர்ந்ததல்ல என்பதை எங்குவேண்டுமாலும் நிரூபிக்கத்தயார்.

- வி - 17.03.71

* பத்து கள்ளுக்கடைகள் மூடப்படுவது ஒரு கோயிலைத்திறப்பதற்குச் சமம். கோயிலை மட்டும் வைத்துக்கொண்டு கள்ளுக்கடைகளை மூடவேண்டுமா?

- வி - 20.06.1973

வி - விடுதலை, கு.அ - குடியரசு.